Christian and Technology - ယုံကြည်သူနဲ့ နည်းပညာ

ဘာသာရေးမှာ စိတ်ထက်သန်သူတချို့ဟာ နည်းပညာ technology ကို အဆိုးမြင်တတ်တယ်။ ဒါတွေဟာ လောကီဆန်တယ်။ အချိန်ကုန်တယ်။ လူပျက်စီးတယ်လို့ မြင်ကြတယ်။ ဒီအယူအဆ မှန်၊ မမှန် စဉ်းစားကြည့်ရအောင်ပါ။

Amish people - အမေရိကားရှိ Ohio, Pennsylvania, Indiana ဒေသတွေမှာနေပြီး အစဉ်အလာကို ထိန်းချင်တဲ့ အုပ်စုတစုဖြစ်တယ်။ လူမျိုးတမျိုးလို့ ဆိုလိုတာမဟုတ်ဘဲ ယုံကြည်ချက်တူတဲ့ လူတစုကို ခေါ်တာဖြစ်တယ်။ နေထိုင်ပုံ ရိုးရှင်းတယ်။ ဝတ်စားပုံ ရိုးတယ်။ ခေတ်ပေါ်နည်းပညာတွေကို လက်မခံဘူး။ တတ်နိုင်သမျှ ရှောင်ဖို့ ကြိုးစားတယ်။

လူဦးရေက ၂၀၁၀ ခုနှစ်အရ အမေရိကားမှာ ၂၄၉,၀၀၀ ခန့်ရှိတယ်။

ဘာသာစကားအနေနဲ့ ဂျာမန်စကား၊ Pennsylvania Dutch တွေကို သုံးကြပြီး၊ အရင်က ကျွန်တော်တို့တိုင်းပြည်မှာ ဥရောပတိုက်သားတွေကို အင်္ဂလိပ်၊ ဂျာမန်၊ ပြင်သစ် စသည်ဖြင့် မခွဲတော့ဘဲ ဘိုလို့ အလွယ်ခေါ်ကြသလို၊ Amish မဟုတ်တဲ့ သူတွေကိုတော့ လူမျိုးမခွဲတော့ဘဲ English တွေလို့ပဲ ရောပြီးခေါ်တတ်ကြတယ်။

 

Amish တွေဟာ အယူသည်းတဲ့ Cult တွေမဟုတ်ဘဲ ခရစ်ယာန်တွေသာ ဖြစ်တယ်။ သူတို့ဟာ ……

•   non-resistance အကြမ်းမဖက်တဲ့နည်းကို နှစ်သက်သူတွေဖြစ်တယ်။ စစ်မတိုက်ချင်ဘူး။ စစ်ထဲမဝင်ချင်ဘူး။ တရားဥပဒေ စိုးမိုးရေးနဲ့ ရဲလုပ်ငန်းကို သဘောမကျဘူး။

•   အစိုးရကျောင်းတွေကို မကြိုက်ဘူး။ Amish ကျောင်းတွေ သပ်သပ်ရှိတယ်။

•   အိမ်ဆောက်ရင် ခေတ်မှီနည်းပညာတွေမသုံးဘဲ လက်သမားအတတ်သင်ပြီးတော့ အများစုပေါင်းပြီး အိမ်ဆောက်ကြတယ်။

•   ခေတ်ပေါ်နည်းပညာ technology တွေမကြိုက်တဲ့အတွက် .... ကားဝယ်မစီးဘူး။ မြန်ဆန်တဲ့ နည်းပညာတွေဟာ လူ့အသိုင်းအဝိုင်းကို ဖြိုခွဲနေတယ်လို့ ယူဆတဲ့အတွက် မြင်းလှည်းကလေးတွေပဲ သုံးကြတယ်။ လျှပ်စစ်မီးမသွယ်ဘူး။ ရေဒီယို၊ T.V, ကွန်ပြူတာ မသုံးဘူး။

•     ဓါတ်ပုံ မရိုက်ကြဘူး။ ရုပ်တုကိုယ့်အဖို့ လုပ်တာ၊ အချည်းအနှီး ကျော်ဇောကိတ္တိကို ရှာတာလို့ ယူဆတယ်။

•     အဝတ်အစားကတော့ တခြားအရောင်းတွေ မသုံးဘဲ အဖြူနဲ့ အမဲပဲ သုံးကြတယ်။ အင်္ကျီမှာ ကြယ်သီးတွေ၊ ဇစ်တွေ၊ ကပ်ခွါတွေ မသုံးကြဘူး။ ကြွားဝါရာကျမယ်လို့ မြင်တယ်။

•     အသက် ၁၈ နဲ့ ၂၀ ကြားမှာ နှစ်ခြင်းခံဖို့၊ အသင်းတော်ထဲ ဝင်ဖို့ ဆုံးဖြတ်ပြီး ယုံကြည်ချက်တူသူနဲ့ လက်ဆက်ကြတယ်။

ဒါတွေကို ကြည့်ရင် Amish တွေမှာ အားသာချက်တွေ ရှိသလို၊ အားနည်းမှုတွေလည်း ရှိတာတွေ့ရပါမယ်။ ရောင့်ရဲတဲ့စိတ်နဲ့ ယုံကြည်ချက်အတွက် တချို့အရာတွေ စွန့်လွှတ်ရဲတာဟာ လေးစားစရာပါ။ နည်းပညာကို စွန့်ပစ်ထားတာက ဝမ်းနည်းစရာပါ။

Amish တွေအကြောင်းကို စဉ်းစားတဲ့အခါ Technology ကို မကြိုက်တာဟာ ဘာသာရေး အယူဆိုတာထက် လူမျိုး အသိုင်းအဝိုင်းရဲ့ preference (ပရက်ဖရင့်) အကြိုက်နဲ့ choice ရွေးချယ်မှု ဖြစ်တာကို တွေ့ရပါတယ်။

၁ ကော ၅း ၁၀ “လောကီသားတို့နှင့် အလျဉ်းမပေါင်းဖေါ်ရဟု မဆိုလို။ ထိုသို့ဆိုလျှင် သင်တို့သည် လောကီမှ ထွက်သွားရကြမည်။”

Technology ဟာ အသုံးချခံပညာရပ်တခုသာဖြစ်ပြီး၊ မကောင်းမှုရဲ့ အခြေခံလို့ မယူသင့်ပါဘူး။

ဥပမာ။ ငွေကတော့ သုံးနေရမှာဖြစ်ပြီး ငွေကို တပ်မက်တဲ့စိတ်ကတော့ မကောင်းပါဘူး။ Technology ကို သုံးနေရမှာဖြစ်ပြီး၊ စိတ်ထားမကောင်းရင်တော့ အပြစ်ဖြစ်နေမှာပါ။

    "ခံတွင်းမှထွက်သောအရာမူကား၊ နှလုံးထဲက ထွက်လာ၍ လူကိုညစ်ညူးစေသော အရာဖြစ်၏။ မကောင်းသောကြံစည်ခြင်း၊ လူ့အသက်ကို သတ်ခြင်း၊ သူ့မယားကို ပြစ်မှားခြင်း၊ မိန်းမလွတ်နှင့် မှားယွင်းခြင်း၊ သူ့ဥစ္စာကို ခိုးခြင်း၊ မမှန်သော သက်သေကိုခံခြင်း၊ သူ့အသရေကို ဖျက်ခြင်းအရာတို့သည် နှလုံးထဲက ထွက်လာ၍၊ လူကို ညစ်ညူးစေသောအရာဖြစ်ကြ၏။” - မသဲ ၁၅း ၁၈- ၁၉။

ကောင်းကွက်များ

- သမ္မာကျမ်းစာ အလွယ်တကူ ဖတ်ရှုခွင့်ရလာတယ်။ တချို့သူတွေ အရင်က စိုးရိမ်တာ ရှိခဲ့ဖူးတယ်။ ကျမ်းစာကို စာတန်က ဖျက်ဆီးပြီး ကမ္ဘာပေါ်ကနေ ပျောက်ကွယ်သွားစေချင်တယ်။ ဒါကြောင့် ကျမ်းစာတအုပ်လုံး အလွတ်ကျက်ဖို့ နှိုးဆော်တာတွေ ရှိခဲ့ဖူးတယ်။ အခု ဒီလို စိုးရိမ်စရာ မရှိတော့ဘူး။

•  ဓမ္မသီချင်း သံပုံစာအုပ်တွေ အလွယ်ရနိုင်သွားပြီ။

•  Commentary အနက်ဖွင့်ကျမ်းတွေ၊ Concordance ကျမ်းညွှန်းစာအုပ်ကို ကွန်ပြူတာနဲ့ ဖုန်းတွေထဲမှာ လွယ်လွယ်ထည့်ထားနိုင်ပြီ။

•  ဝိညာဉ်ရေး စာစောင်တွေကို e-book တို့ Phone application အနေနဲ့ဖြစ်စေ ဖတ်ရှုဖို့ အခွင့်အရေး ရလာတယ်။

• ကမ္ဘာတဝှန်းက ယုံကြည်သူတွေနဲ့ ဆက်သွယ်လာနိုင်ပြီ။

•  ပညာရေးမှာလည်း နည်းပညာက အများကြီး အထောက်အကူပြုလာပြီ။ ကိုယ်သိချင်တဲ့ပညာရပ်တွေကို ကွန်ပြူတာနဲ့ အင်တာနက်မှာ ရှာဖွေလေ့လာနိုင်ပြီ။

•  ကျန်းမာရေးမှာ ရောဂါသဘာဝ၊ ဆေးဝါးနဲ့ အဟာရတွေကို ပိုပြီး လေ့လာသိရှိလာနေပြီ။ ဒါဟာ လူ့အသက်တွေကို ကယ်နိုင်ဖို့ အခွင့်အလန်းပဲလို့ မှတ်ယူသင့်ပါတယ်။

•  လမ်းပန်းဆက်သွယ်ရေးမှာ တနေရာနဲ့တနေရာ သွားဖို့ လွယ်လာတယ်။

စိတ်ကောင်းလေးရှိဖို့သာ လိုပါတယ်။ technology က လွယ်ကူစေမှာ ဖြစ်ပါတယ်။

 ၁ကော ၁၀း ၃၁ “သင်တို့သည် စားသော်၎င်း၊ သောက်သော်၎င်း၊ မည်သည့်အမှုကို ပြုသော်၎င်း၊ ဘုရားသခင်၏ ဘုန်းတော်ကို ထောက်၍ ခပ်သိမ်းသော အမှုကိစ္စကို ပြုကြလော့။”